سرمد الطائي

صدام.. مقالك عن اولادي زين بس الصورة من العالم السفلي.. الفن محترم لكن يحتاج خيال ثائر.

سرمد.. عوف المقالات. انت وعدتني في حلم سابق ذاك الشهر ان تقنع ابو نادية طه.. بسرد تفاصيل حول غزال حماد شهاب ودوره في الاطاحة بعبد الرزاق النايف يوم ٣٠ تموز.. وين صار طه هسة؟

صدام.. ضاحكا وهو يمشي في حديقة مترامية الاطراف .. يعني الاميركان نشروا التسجيل السري وسمعتوه؟ هههههه.. مشكلتنا كانت مع حردان وعماش مو حماد شهاب وغزالتو. ترددهم ذبحنا. واحد ملتهي بعصاتو والاخر ملتهي بالنسوان اذبحونا.. ابو نادية كان بوزارة الدفاع ما عنده خبر عن القصر الجمهوري. بذاك الظهر الاحمر يوم ثلاثين تموز.. الشهود فقط برزان وصلاح عمر العلي وجعفر الجعفري

سرمد… هم الجعفري؟

صدام… اي طبعا جعفر الجعفري الخبل كان راس الحربة من دخلنا على اجتماع البكر والنايف.
دعوفك من هالقصة انا مشغول بنبوءة بيت المعسل ذولة مهمين وحددوا يوم مقتلي. الف شخص بينهم قادة حرس خاص راح يجتمعون على قتل صدام وانطوني تاريخ تقريبي

سرمد.. ابو عدي يا بيت معسل. اولا انت واسف على التعبير.. رجل ميت جايني بالحلم. ثانيا القواعد تغيرت وزمن الانقلابات راح هسة الشعوب عندها تطلعات مختلفة وانترنت وفيسبوك يا بيت المعسل. ذولة كروب وتساب لو جيش الكتروني؟

صدام… لا مو هالشكل تقاس الامور وبيت المعسل اختبرتهم چثير. ذاك اليوم سوولنا شغلة خدعنا بيها اكيوس وبتلر وتنت وكوفي عنان. اريد اتضامن مع المظلومين في نظام اللاعدالة الاميركي. اكو قصص عن ثلاثين مليون مشرد اميركي لازم نشتغل عليهم. خل اصيحلك برزان ينطيكم معلومات تابعوها خل نفضح بوش وحضارة الغرب المتوحشة. هذا مفتاح القصر. اغلق الباب قبل لا تطلع. وخلي نسخة يمك.

سرمد… ابو عدي. ماكو مفتاح للقصر. القصور تحرسها العقول . انت تدير دولة بعقلية غزال حماد شهاب وانقلابات الظهر التموزي. انت ذكي معقولة ما لقفتها وخلصتنا من هالورط؟

صدام ضاحكا للمرة الاخيرة… اجمعوا تسجيلاتي السرية اللي نشروها الاميركان على يوتيوب. واقروا مذكرات اخوي برزان. موجودة بي دي اف. وانا ما اخذ شور الا من راس بيت المعسل. ذولة دراويش من الهند استقروا عدنا. وما طمعانين. اكو الفين جندي شهداء هسة كاعدين بقاعة الخلد لازم اخذلهم اكل. الموتى هم يجوعون ومبتلي بهالقيادة ومسوولياتها. الاف الجنود شباب حلوين وموتى وجوعانين ويطاردون وراي عبالك انا موتتهم. اقفل باب القصر ترا اطرك اربع وصل.